Sir 15

a15.11-20Sir 17.1-12, Ya 13-15

1 Ainde í̠na Anduane Homogo gi howa ibu andaneha hariyagua nde í̠na mana tigabi bialu holebere. Ani bialu í̠na Anduane Homogonaga bi mana ngago baya hangu talialu hariyagua nde mini bayale wulene handa walia holebere. 2 Wali ai̱ya bedagome ti waneigini lone ngola hagadagua bialubi wandari mabuageme igiri ibu agalini holene biago ngola hagadagua bialubi mini gigabi wulene ibugua í̠ abaleore ibu lalu haga nga. 3 Ani poregola mini gigabi wulene ibugua manda bayale tomo ale ngialu mini bayale iba nolene gagahe ale ngiagane nga. 4 Í̠ pilolino ibugua baya hangu haru haga ka. Í̠ha taga holene ngaru anda ibulino ibugua baya hangu haru holebira. 5 Wali agali í̠ni damene bu karu ti dege dombeneha í̠ keria mini gigabi wulene ibugua í̠ mini lene mbirago helolebira. Ani bialu wali agali íbu ngoai ho kagoria í̠na bi bayale tigabi ngago latagi habelo mini gigabi wulene ibugua í̠ lamogo bulebira. 6 Í̠ turu halu turu holene yu howa í̠naga mini timbuniore mini lene mbirago holebere.

7 Wali agali lulu bu karume mini bayale ogoni taya nabulebira. Ani bialu wali agali mana ko biaga bu karume mini gigabi wulene nahondolebira. 8 Mini gigabi wulene ibu wali agali mine haga karuha kaware nahaga. Wali agali ke̱ haga bu karume ibu mitangi naholebira. Mini gigabi wulenehondo wali agali mana ko biaga bu karume bi bayale lamiyagua ogoni henene ndo lehe lolebira. Tigua mini gigabi wulene mo turu holene bi lelonaga Anduane Homogohanda tinaga ne hambuni mo wia nahaga ka. 10 Anigo wali agali mini gigabiwi bu karuha dege bi anidagua layagua ogoni karulapego irane Anduane Homogo ibunime bi ogoni tinaga ne hambuni mo wia haragola lolebira.

Wali agali tini hameme mbirale bero lalu biaga lenego ogo

11 Anduane Homogo Ngode Datagaliwabehanda mbirale ibu hame naledago nabiaga kago ai wali agalime lalu Anduane Homogohanda i̱ mohondo haya lolene nakarulape. ^a 12 Wali agalime mana ko ngago bilo Anduane Homogohanda mo bia nahagago ai Anduane Homogohanda í̠ mo luluya haya lolene nawigo nalabe. 13 Anduane Homogohanda wali agali mana ko bialu kagonaga tandaga timbuni haga kagola wali agali ibuni andaneha haga bu karu tiguabi mana ko bulene hame nalolebira. 14 Bambaore Anduane Homogohanda wali agalila wabini. Ani wabu helowa ibugua libuhondo mbirale bibahende ko bayalela libuni miniha mo tale bilo mo tale bulene hongo libuhondo mini. 15 Mbirali ibu hangu hangu hameme mana bayale talialu bulene ngago ainde heneneore í̠na Anduane Homogonaga bi mana lo ngago talialu bulene karulape. 16 Ira dedaorebi ibabi kirabali Anduane Homogohanda í̠naga giha mo ya ho heledagoni ndobe. Ai í̠nime mo tale bialu í̠ hame ledego mo yarene. 17 Anidagua dege holenebi homolenebi kirabali Anduane Homogo ibuni yu kago wali agali mbirago ibu mule hame laragoale mo mulebira. 18 Anduane Homogonaga manda timbuni daligaorene daliga nga. Anduane Homogo ibu bolangua hene daligaore kagola ibunaga deni mbirale mbira mo do hene nawiore ndobe. 19 Anduane Homogo ibunaga de mbirale wali agali tigua bialu kagoha ibagabu hai ka. Tigua mbirale bialu kago damene Anduane Homogo ibuni handai ho ka. 20 Wali agalime mana lehe bia ko holene ngarubi mana ko nabulene ngarubi bialu halimu lalu Anduane Homogohanda ti laminigo ndo bialu ka.